Transieram celerem nebuloso flumine Nauam, addita miratus ueteri noua moenia Uinco, aequauit Latias ubi quondam Gallia Cannas infletaeque iacent inopes super arua cateruae. unde iter ingrediens nemorosa per auia solum et nulla humani spectans uestigia cultus praetereo arentem sitientibus undique terris Dumnissum riguasque perenni fonte Tabernas aruaque Sauromatum nuper metata colonis: et tandem primis Belgarum cnspicor oris Noiomagum, diui castra inclita Constantini. purior hic campis aer Phoebusque sereno lumine purpureum reserat iam sudus Olympum. nec iam, consertis per mutua uincula ramis, quaeritur exclusum uiridi caligine caelum: sed liquidum iubar et rutilam uisentibus aethram libera perspicui non inuidet aura diei. in speciem tum me patriae cultumque nitentis Burdigalae blando pepulerunt omnia uisu, culmina uillarum pendentibus edita ripis et uirides Baccho colles et amoena fluenta subter labentis tacito rumore Mosellae.